Soil Education: An Integrated STEM Approach

 

Soil Education: An Integrated STEM Approach - учење за почвата и нејзината важност за одржлива иднина 

Овој курс нуди одлична можност за наставниците да ја продлабочат својата свест за значењето на почвата и нејзината улога во зачувувањето на животната средина и создавањето одржлива иднина. Преку интегриран STEM пристап, курсот покажува како една навидум секојдневна тема може да се претвори во интересно, истражувачко и интердисциплинарно учење.

Особено вредно е запознавањето со 5E наставниот модел, кој поттикнува активно учество, истражување, поставување прашања, експериментирање и критичко размислување кај учениците. Преку четири модули, се истражуваат биолошките, хемиските, економските, општествените и етичките аспекти на здравјето на почвата, поврзани со реалните предизвици и целите за одржлив развој.

Она што го прави курсот посебно корисен е неговата практична насоченост - стекнатите знаења се применуваат преку креирање сопствено наставно сценарио кое може да се искористи во секојдневната наставна практика.

Топло го препорачувам на сите наставници кои сакаат да ја направат наставата поинтересна, поинтегрирана и поблиска до реалниот живот. Курсот нè потсетува дека почвата не е само дел од природата што треба да ја изучуваме, туку богатство што треба да го разбереме, чуваме и пренесеме на идните генерации.

OUTSTE(A)M in Action: Let's STE(A)M MOOC

 

OUTSTE(A)M in Action: Let's STE(A)M MOOC - курс

што вреди да се следи! 

Овој курс е одлична можност за наставниците и воспитувачите да откријат нови, креативни и практични начини за примена на STE(A)M пристапот во наставата. Особено ми се допадна што не се задржува само на теорија, туку нуди конкретни идеи, ресурси, активности и примери кои можат да се применат и во училница и во учењето на отворено.

Преку четири модули, курсот нè поттикнува да ја поврземе науката, технологијата, инженерството, уметноста и математиката со истражување, игра, креативност и секојдневни ситуации. Посебна вредност имаат практичните материјали од OUTSTE(A)M Toolkit и примерите на наставни сценарија кои нудат инспирација за создавање поинтересни и поактивни часови.

Она што дополнително го издвојува курсот е можноста да учите со сопствено темпо, без рокови, и да ги применувате стекнатите знаења според потребите на вашите ученици.

Моја препорака до колегите: Доколку сакате да внесете повеќе истражување, експериментирање, креативност и учење преку практични активности во вашата настава, топло ви го препорачувам овој курс. Не само што ќе добиете нови идеи, туку и поттик да погледнете на наставата од поинаква, поинспиративна перспектива.

Scientix STEM Discovery Campaign 2026

 

Од мај до декември 2025 година реализиравме 11 STEM активности, кои се успешно одобрени и објавени на STEM мапата за 2026 година во рамките на Scientix STEM Discovery Campaign.

Оваа меѓународна иницијатива ги повикува наставниците, училиштата и организациите да ги промовираат науката, технологијата, инженерството и математиката (STEM) преку различни едукативни активности.                        Сите учесници кои пријавуваат активности на мапата имаат можност да конкурираат за Scientix Awards, кои ги наградуваат најдобрите практики и иновации во STEM образованието. 

XLVII Школа „Млади физичари“

XLVII Школа „Млади физичари“ се одржа на 13 и 14 ноември 2025 година на Природно-математичкиот факултет, Институт за физика во Скопје. Во организација на Друштвото на физичарите на Република Македонија (ДФРМ), овој престижен настан и годинава ги обедини најљубопитните и најкреативните млади умови од основните и средните училишта ширум државата. Учениците имаа можност да ги презентираат своите научни експерименти, истражувачки трудови и иновативни проекти пред стручна комисија и публика.

Традиционално, учениците од ООУ „Димитар Миладинов“ - Општина Центар, Скопје, земаа активно учество и уште еднаш докажаа дека припаѓаат меѓу најуспешните млади физичари во Македонија. Благодарение на нивната посветеност, креативност и љубов кон науката, оваа година се закитија со вкупно 10 награди - 3 први, 2 втори и 5 трети награди.

Присуството на ученици од сите краеви на земјата и високото ниво на натпреварувачки дух му дадоа на настанот вистински државен карактер и создадоа незаборавна атмосфера исполнета со знаење, инспирација и научна возбуда.

Исто така, редовни онлајн гости на ваквите манифестации се и нашите проектни партнери и соработници од цела Европа – eTwinning пријателите. Нивното присуство, поддршка и интерес за активностите на нашите ученици претставуваат вистинска мотивација и поттик за понатамошни заеднички иницијативи. Изразуваме искрена благодарност за нивната континуирана соработка, идеите што ги разменуваме и инспирацијата што ја споделуваме преку европските образовни мрежи. Токму овие партнерства ја збогатуваат нашата работа и ја отвораат вратата кон нови проекти, меѓународни пријателства и уште посилна поддршка на младите таленти во науката.

Од септември па сè до 10 ноември вредно се подготвувавме. Успеавме да организираме и два саеми/фестивали на наука на регионално ниво. Работата и трудот секогаш позитивно влијаат и носат добри резултати.

10. 11.2025 - Одбележувањето на Светскиот ден на науката за мир и развој имаше за цел да ги поттикне промените во образовниот систем, да го зајакне научниот дух кај младите и да ги охрабри да станат дел од идните научни откритија и иновации кои ќе ја обликуваат иднината. https://nasmedium.blogspot.com/2025/11/blog-post.html

21.10.2025 - Осмиот регионален Саем за наука – Манифестација која ги надмина границите на креативноста и науката во основното образование https://volsebnici2024.blogspot.com/2025/11/21.html

Паралелно и сериско врзување на ластици / Предвидување на промени на обликот (Јана А.)

 

Дијагностички тест по физика за 9. дд. (I и II група)

 септември 2021

1. Што е физичка величина?

2. Што е тежина?

3. Со што е определена и со што се мери силата?

4. Што е патека или траекторија?

5. Дали телата истовремено можат да поседуваат кинетичка и потенцијална енергија? Објасни.

6. Наброј ги карактеристиките на ликот во рамно огледало.

7. Кога се случува  пролетна рамноденица?

8. Што е сила?

9. Кога една сила има вредност од еден њутн?

10. Дефинирај рамномерно забрзано движење.

11. Што е референтно тело?

12. Во кои случаи еластичните тела можат да поседуваат потенцијална енергија иако не се поткренати на некоја висина?

13. Кога светлинскиот зрак може да премине од една оптичка средина во друга, без да го промени правецот на простирањето?

14. Кога се случува  есенска рамноденица?

15. Сончевите зраци паѓаат под агол од 60º. Под кој агол треба да се постави рамно огледало за да зраците се одбиваат вертикално?

16. Колку време му е потребно на еден автомобил за да помине 180 km од еден до друг град ако неговата просечна брзина е 60 km/h? 

17. Со колкава брзина се движи тело со маса m = 10 kg ако неговата кинетичка енергија е Ek = 100 J?

18. Пред рамно огледало на растојание од 25 cm е поставен предмет. За колку ќе се зголеми растојанието меѓу предметот и неговиот лик, ако предметот се оддалечи од огледалото за 15 cm?

19. Едно возило се движи рамномерно забрзано со забрзување од 3 m/s². Колкав пат ќе измине за првите 10 секунди?

20. До која висина треба да се фрли камен со маса од 200 g во највисоката точка, неговата потенцијална енергија за да изнесува 100 J? (g = 10 m/s²)

Самооценување и оценување од соучениците

Примери на самооценување и оценување од соучениците каде учениците се вклучени во оценувањето и е создадена позитивна клима за реално вреднување на сопствените постигнувања.